أبلة أمينه

أبلة أمينه.. على شنهو تلومينا؟.. على إن الحزن خالد.. والفرح عمره ما يدوم فينا؟؟

أبلة أمينه.. أذكر أيام الطفوله.. كنا نبالغ باللي نقوله.. أحمد يقول بيصير ضابط ويدافع عن وطن غالي.. وأقول أنا بصير لاعب وأرفع هالعلم عالي.. وكنتي إنتي تشوفينا.. وبلهفة تنادينا.. تقولين إنتوا الأمل .. إنتوا ورد ما ذبل.. إنتوا وحدة اراضينا

وكبرنا وكبر هذا الوطن فينا.. وصرنا ندور على زرعه.. نغرسها ونحصدها.. نبي نخدم.. نبي نبني.. نبي نضوي للوطن شمعه.. وحلمنا بس نبي أحد يسمعه.. ولا أحد حوالينا!!

أبلة أمينه.. بنلومج وإعذرينا.. ما سمعنا منج إن اللصوص بكل مكان.. وإن الوفي ماله أمان.. وإن الغدر له هالزمان؟؟ ما عرفنا إن المبادئ تنكتب بطبشور أبيض.. ومستحيل إنها بتنبض.. وتنمحي مع الجرس.. وينتهي كل اللي فينا إنغرس

ماكنا نعرف من قبل أي عائله وأي طائفه.. حب الوطن إهوا اللي كنا نعرفه.. واللي يخدم هالوطن.. دوم كنا نصنّفه.. إن واحد حب البلد.. ولا همنا منو هالولد.. لاهو سني لاهو شيعي.. لاهو بدوي لاهو حضري.. إهوا كويتي للأبد.. هذا اللي كنتي تقولينه.. شوفي شلون ذبل فينا

أبلة أمينه.. قلتي اللص دوم يخاف.. وهذا لصنا المشهور.. شرى الإعلام شرى الأقلام.. وصار يتكلم بإسم النور.. والدستور.. آه كم مسكين هالدستور.. كاهو جدامنا مكسور.. والكل واقف وشاهد.. ولا أحد يبي يساعد.. ويرجّع هيبة المأسور.. ويعيد الماضي وسنينه

أبلة أمينه.. شوفي قاموا يسبون أمي بإسم الإصلاح!! ويطعنون بإختي و بنتج ومحد صاح.. وين الحق علمينا.. نبي صفعة تصحّينا.. تقول كابوس لا تحاتون.. وينهي كل ظلام الكون.. وترد الحق لأصحابه.. والفاسد تسد بابه.. وتنادينا.. وتصحّي مارد فينا.. يردد صرخته بكل بيت.. تعيش الكويت.. تعيش الكويت

أبلة أمينه أول مدرّسه درستني بالمرحلة الإبتدائية- مدرسة عبدالله عبداللطيف العمر

في الصورة

وقوفا من اليمين: حامد مجيم الشلال – عيسى نجيب العيسى – بدر صالح النمش – رباح البلوشي –بدر مبارك المبارك – جابر الهزاع
جلوسا من اليمين: مؤيد صالح العمر – علي زيد الحوطي – سلطان عيد السهلي- ضرار حمد السليم – محمد فهد العصفور
جلوسا من اليمين: علي محمود خاجه – غازي العصيمي – يعقوب يوسف أسد – أحمد عبداللطيف ملك

مجلة أبواب عدد إبريل 2008